ROXAS CITY, CAPIZ- Yara pa sa 30 ka mga barangay sa probinsya sang Capiz ang indi pa drug-free, sandig sa monitoring sa Philippine Drug Enforcement Agency (PDEA) Region 6.
Sa interview sang Bombo Radyo kay Ma. Graziela Tanaleon, Spokesperson sang Philippine Drug Enforcement Unit Region 6, iya ginpahayag nga nagapadayon sa gihapon ang ila nga kampanya sa pagtapna sang iligal nga droga.
Suno kay Tanaleon, kaupod nila sa pagmonitor kag pag-implementar sang mga programa sa pagtapna sang iligal nga mga aktibidad ang Department of Interior and Local Government Unit, mga Local Government Units kag mga natungdan nga ahensya bilang myembro sang Oversight committee.
Samtang, wala na gindetalye pa sang ila nga talatapan kun ano nga mga barangay ang nalakip sa indi pa drug-free sa probinsya sang Capiz.
Pahayag pa nya, yara naman sa kabug-usan 119 ukon 3.51% ka mga barangay sa bilog nga Western Visayas ang indi pa drug-free sa diin ginakalakipan ini sang sa Iloilo City nga may yara sang 83 ka mga barangay, Capiz nga may yara sang 30, kag Iloilo Province nga may yara sang anom (6).
Yara naman sa 96.49% ukon kabaylo sa 3,270 sa 3,389 tanan ka mga barangay sa Western Visayas ang drug-cleared kag drug-free na.
Nagapanawagan naman ang natungdan sa tagsa-tagsa nga magpakigbahin sa mga programa sang ila nga talatapan sa pagtapna sang mga iligal nga aktibidad partikular ang may kaangtanan sa iligal nga droga.
Interviewed by Bombo Francis Biñas
