Gin-athag sang International Criminal Court (ICC) ang proseso para sa apat (4) ka adlaw nga confirmation of charges hearing may kaangtanan sa crimes against humanity case batuk ka Former President Rodrigo Duterte sa iya kontrobersyal nga kampanya kontra droga.
Suno kay ICC spokesperson Oriane Maillet, magasugod ang hearing sa Pebrero 23. Ginpaathag sini nga indi ini trial, kundi pre-trial hearing pa lamang.
Sa sini nga bahin, ang mga judges indi pa makadesisyon kon bala mangin inosente ukon guilty si Duterte. Sa baylo, ang mga judges antes ang hearing maga-usisa sila kon bala may bastante nga ebidensya sa pagdala sang kaso sang anay Presidente sa hearing.
Una na nga ginpahayag sang ICC nga indi sini pagtugutan ang hearing nga wala ang akusado kun makumpirmar ang mga panumbungon.
Apang, ginhatagan sang Pre-Trial Chamber I ang pangabay ni Duterte nga indi magtambong sa confirmation of charges hearing bangud sa iya ikaayong lawas.
Suno kay Maillet, sa sulod sang apat ka adlaw nga hearing, ang Pre-Trial Chamber magapamati sang mga argumento gikan sa prosekusyon, defense, kag legal repreesentatives sang mga biktima.
Pagkatapos sini, ang mga hukom may 60 ka adlaw sa pagrepaso sang mga ebidensya kag maghimo sang desisyon kon bala magapadayon sa hearing.
