DUMALAG CAPIZ – Ginsabat ni Mr. Raoul V. Perez Acting Provincial Agriculturist, ang reklamo sang isa ka mangunguma sa Barangay San Martin banwa sang Dumalag matapos wala ini madala sa listahan sang benepisyaryo sang mangunguma nga gin-igo sang El Nino.
Matandaan nga personal nga nagpadulong sa talatapan sang Bombo Radyo si Mr. Arvin Farinas mangunguma kag residente sang Barangay San Martin, Dumalag, Capiz agud ipalab-ot ang indi patas nga pagpanglista sang ila mga Barangay Officials kag Municipal Agriculture apisar nga qualify man sila sa ginapangayo nga requirements.
Sa interview sang Bombo Radyo kay Perez, ginsiling sini nga nagabase lamang sila sa listahan nga ginapasa sa ila nagikan sa Municipal Agriculture Office kag ang ila lamang obligasyon i-check ang spelling sang mga pangalan kag kun may yara sang mga nagdoble.
Suno kay Perez nga base sa reklamo ni Farinas, posible nga nadala na ini siya sa listahan sa ila barangay apang pag-abot sa ila LGU wala na ini masulod sa masterlist.
Mahibaluan nga nagtan-ay sang bulig pinansyal ang gobyerno national para sa mga mangunguma nga naapektuhan sang El Nino kun sa diin magabataon ang mga ini sang tig-P10,000.00.
Samtang, nagalaum man si Perez nga kun tani madugangan pa ang pondo agud matigayon nga mahatagan ang mga mangunguma nga wala makabaton sang nasambit nga ayuda.
