ROXAS CITY – Ginkompirmar sang pamunuan sang Hospital Management Services sang provincial government ang plano nga pagpatindog sang kaugalingon nga RT-PCR Testing laboratory sa probinsiya sang Capiz.
Ginpahayag ni Dr. Ramon Alex Nolasco nga luyag ni Capiz Governor Esteban Evan Nonoy Contreras nga magpatindog ang probinsiya sang kaugalingon nga RT-PCR testing laboratory.
Suno kay Nolasco nga kapin sa P17.5 milyones ang ginpain nga pondo sang probinsiya sa pagpatindog sang nasambit nga laboratory kun sa diin P7.5 milyones ang pagagamiton sa pagpatindog sang istraktura samtang ang nabilin nga pondo, ang pagagamitonn sa pagbakal sang RT-PCR machines kag mga kits.
Gindugang pa ni Nolasco nga plano sang probinsiya nga ipahamtang ang nasambit nga laboratory sa Out-Patient Department sang Roxas Memorial Provincial Hospital sa Barangay Lanot sining siyudad.
Ginpanindugan ni Nolasco nga daku ang mabulig sang nasambit nga laboratoryo agud mas madasig nga mahibaluan ang resulta sang isa ka indibidwal nga ginpaidalum sa RT-PCR test.
Samtang ginpahayag man ni Nolasco nga magluwas sa Covid-19, sarang man nga mapaidalum sa test ang iban nga sahi sang viral diseases sa amo nga laboratory.
