CAPIZ – All-set na ang provincial government sang Capiz para sa pagselebrar sang Chinese New Year humalin Pebreo 16 tubtob 17.
Sa interview sang Bombo Radyo kay Dr. Cesar Yap Jr., Chairman sang Tourism Committee, iya ginpahayag nga madamu sang mga aktibidad ang nakalinyada sandig man sa ordinansa sang probinsya nga magpatigayon sang selebrasyon sa kada tuig .
Suno kay Yap, may patigayunon nga dotting of lion and dragon’s eyes , lion and dragon dance, cooking competition and demonstration, launching of prosperity tree kag fireworks display.
Pahayag pa niya, ang pagselebrar sang Filipino-Chinese Community ang masami may yara sang ampao ukon prosperity bowl kag mga pagkaon sa lamesa kaangay sang isda nga nagasimbolo sang prosperity, noodles para sa long life kag tikoy para sa mas hugpong nga relasyon sang pamilya.
Nahibaluan nga ang tinutuyo sang Chinese New Year amo ang pag-angkon sang paglaum- pag-isa kag pagpasalamat.
Gina-imbitar man sang natungdan ang tanan, chinese man ukon indi sa pagtambong kag pag-upod sa pagsug-alaw sang Year of the Fire Horse.
