ROXAS CITY – Ginpaintiendi sang Provincial Government kag CAPENRO ang importansya sang mga pumuluyo sa plano nga pagpatukod sang Ecological Solid Waste Managemen sa mga pumuluyo sang Barangay Acbo, Sigma, Capiz.
Ini ang gintambongan ni Governor Esteban Evan Contreras, Provincial Administrator Dr. Edwin Chinel Monares, Vicente Los Bañez, Section Chief sang Solid Waste Management DENR- EMB Region 6, Mayor Christopher Andaya sang Sigma kag mga miyembro sang Sangguniang Bayan.
Suno kay Contreras nga indi ini matawag nga sanitary landfill bangud makatuga pa ini sang madamo nga trabaho sa mga tawo kag mahimo nga tourist attraction.
Ginpasalig naman sang gobernador nga siya mismo ang una nga magapamatok sa Landfill sa tion nga ipahamtang sa nasambit nga barangay.
Dugang pa sini nga ang mga basura nga dal-on diri ang iga-recycle man ukon sarang mabaligya kag mahimo pa maggamit bilang organic fertilizer ukon farming gamit ang isa ka machinery sang technical working group.
Apang, may pila sa gihapon nga mga residente ang indi pabor kag indi magpasugot sa nasambit nga plano.
Bilang kabahin naman sang public hearing ginhatagan sang tyansa ang mga residente nga magpamangkot sa katapo sang CAPENRO kag opisyal sang gobyerno.
Ginkwestyon naman sang isa ka residente ang Sanitary Landfill sa Roxas City nga nangin open dumpsite na sang pila katuig.
Samtang, ginklaro naman ni Los Bañez nga indi ini open dumpsite kag may yara sila sang pondo nga ginhatag sa probinsya para sa plastic recycling technology.
Ginpahayag pa sini nga sa pihak sang pagpamatuk sang mga residente kinahanglan sa gihapon ang acceptance nila bangud kun indi man sila magpasugot indi man sila pagpiliton sang provincial government kag magapangita na lamang sang bag-o nga lugar para sa nasambit nga plano.
