ROXAS CITY – Magapatigayon ang Provincial Tourism and Cultural Affairs Office sang “The Search for Capiz’ Singging Ambassador 2020” ukon Bugal sang Capiz sa bulan sang Disyembre.
Ini ang ginpahayag ni Provincial Tourism and Cultural Affairs Officer Alphonsus Tesoro sang mainterview sang Bombo Radyo.
Suno kay Tesoro nga sarang makapasakop ang nagapang-edaron sang 15 tubtob 60-anyos kag dapat ang representante wala nakapasakop sa anuman nga regional, national, kag international solo singing contest.
Ginpahayag ni Tesoro nga tanan nga mga kabanwahanan ang magapatigayon sang audition kun sa diin magakuha lamang sila sang isa ka partisipante sa tagsa ka mga kabanwahanan sa probinsya.
Sa mga magapasakop sarang nga magpasa sang ila nga birth certificate nga pamatuod nga residente sang probinsya, certificate of residency nagikan sa Punong Barangay kag ipasa antes ang gintalana nga deadline sa ila tagsa ka mga munisipalidad.
Para sa maga-audition kinahanglan nga magpreparar sila sang minus one nga Original Pilipino Music (OPM) or Filipino Folk Song para sa ila piyesa.
Mahibaluan nga may yara sang tatlo ka mga judge nga magapili sang magadaog sa amo nga kumpetisyon.
Para sa criteria for judging, 30% ang Tone (Voice Quality, Vocal Technique, Pitch/Intonation kag Breath Support); 25% ang Musicianship (Tempo, Rhythm kag Dynamics); 20% ang Delivery (Pronunciation, Diction kag Enunciation); 15% ang Showmanship (Department, Stage kag Presence) kag 10% naman ang overall performance (Entertainment Value) kun sa diin nagalab-ot tanan sa kabug-usan nga 100%.
Samtang, magabaton naman sang P20,000 para sa 1st prize winner, P15,000 para sa 2nd prize winner kag P10,000 naman para sa 3rd prize winner kag consolation prizes nga P3,000.
Ang magadaog naman ang igapambato sa mga regional, national kag international singing contest.
