ROXAS CITY – Ginklaro sang Provincial Social Welfare Development Office ukon PSWDO nga indi sila ang nagalista sa mga market vendors nga magabaton sang ayuda nagikan kay Senator Christopher Bong Go.
Ini ang ginpahayag ni PSWDO head Nieva Camposano sang mainterview sang Bombo Radyo.
Suno kay Camposano nga nagabaton lamang sila sang listahan sang mga benepisyaryo nga ginahatag sa ila sang Vendor Association.
Ginpahayag sini nga ang mga pangalan nga nalakip sa master list sang mga small time vendors amo ang ginapasa sa opisina ukon staff ni Bong Go.
Nagalab-ot sa 1,612 ang mga pangalan nga nalista sa amo nga listahan.
Gin-athag man sini nga ang mga kwalipikado sa amo nga ayuda amo ang mga small time vendors kag wala nakabaton sang cash assistance ukon SAP nga P6,000 nagikan sa gobyerno.
Samtang, magluwas sa siyudad sang Roxas nakabaton man ang mga small time vendors sang ayuda nagikan sa Dao, Dumalag, Maayon, Pilar, Pontevedra kag Pres. Roxas, Capiz.
Mahibaluan nga nakabaton ang mga kwalipikado nga mga vendors sang P3,000, food packs kag pamahaw sa Capiz Villareal Stadium.
