ROXAS CITY — Ginbuyagyag ni Punong Barangay Manuel “Bongbong” Aninang sang Barangay Olotayan sining siyudad, eksklusibo sa Bombo Radyo, ang alegar sinindikato nga pagpinanagbo sang isda sang mga katapo sang Philippine Coast Guard sa iban nga mga mangingisda kabaylo sa pagpahanugot sa ila nga makapangisda sa ginadumilian nga porsiyon sang kadagatan sang Roxas City.
Suno kay Aninang, nahibal-an niya kun ano nga mga sakayan ang pirme ginapangayuan sang isda sang mga katapo sang PCG nga nakadetalye sa ila sub-station sa Barangay Olotayan.
Gindugang pa ni Aninang nga kilala man niya kun sin-o nga mga negosyante ang ginabaligyaan sang taga-PCG sang mga isda nga ila pinangayuan sa iban nga mga mangingisda nga iligal nga nagapangisda sa kadagatan sang siyudad.
Ginpahayag pa ni Aninang nga tag tatlo tubtob apat ka banyera nga isda ang ginatagbo sang taga PCG sa iligal nga mga mangingisda nga ginahimo nila kun kaisa sang duha ka beses sa isa ka adlaw.
Kun indi makapalawod ang mga taga-PCG agud magpanagbo suno kay Aninang, mismo ang iligal nga mga mangingisda ang nagadul-ong sa ila sang suplay sa isa sub-station sa Barangay Olotayan.
Nahibaluan man gikan sa punong barangay nga gikan pa sa iban nga probinsiya kasubong sang Masbate kag Negros Occidental ang iligal nga mga mangingisda nga ginapahanugotan sang PCG nga makapangisda sa kalalawran nga sakop sang siyudad.
Ang pagbuyagyag ni Aninang kasunod man sang pagkadakop nila sang 19 ka mga tripulante sang F/B Karen sang nagligad nga Sabado.
Mahibaluan nga nag-alegar ang mga tripulante sang sakayan nga taga-Carles, Iloilo nga ang taga-PCG man mismo sa pagpanguna sang sub-station commander nga si Petty Officer 1st Class Pat Jonard Belarmino ang nagpahanugot sa ila nga makapangisda sa kadagatan nga sakop sang municipal waters sang Roxas City.
Ini matapos nga ginbuligan nila ang mga taga-PCG nga maguyod ang ila sakayan pahigad sang ini ang naaberya malapit sa isla sang Sapatos Gamay.
Samtang nagdepensa naman si Belarmino sa mga alegasyon batuk sa ila ni Aninang.
Suno kay Belarmino, mahimo may nagasamad lamang sa ila nga mga katapo sang PCG bangud ginahimo man nila suno sa iya ang ila trabaho sa pagtapna sang ilegal fishing sa siyudad.
Aminado siya nga may mga mangingisda nga nagahatag sa ila kun kaisa sang isda sa pihak nga ini ang ginapamalibaran nila, apang indi ini sang binanyera kundi kinilo gid lamang.
