ROXAS CITY – Wala na sang kabuhi sang nasapwan si Punong Barangay sang Aglupacan Tapaz nga si Wennie Bluma Dimas sa suba nga sakop sang Barangay Tacayan, Tapaz Capiz.
Sa interview sang Bombo Radyo Police Major Jhon Almarino Bonior, hepe sang Tapaz Municipal Police Station, nasapwan na lamang sang barangay tanod ang naga-lutaw-lutaw nga bangkay kun sa diin yara na sa advanced state of decomposition.
Bangud sa posibilidad nga nagdugay ang bangkay sang biktima sa tubig halos indi na ini makilal-an.
Suno kay Bonior, natigayon lamang nga makumpirmar ang pagkakilanlan sang bangkay matapos nga positibo nga ginkilala sang mga himata sang kapitan ang ginasuksok sini nga bayo, relo kag tattoo sa lawas.
Matandaan, una na nga ginreport nga missing si PB Dimas sang Setyembre 14 kun sa diin katapusan ini nga nakit-an sang Setyembre 13 sa Barangay Sinunod, sang nasambit nga banwa.
Ginabulubanta naman 20 tubtob 30 kilometros ang kalayuon sa Brgy Sinunod kun sa diin nasapwan ang biktima.
Natalana nga igapaidalum sa autopsy ang bangkay ni Dimas agud matumod ang kinamatay sini kag kun ano ang gintunaan sang mga pilas sa lawas.
