PRESIDENT ROXAS, CAPIZ- Ginpa-bombo sang pila ka mga residente sang Barangay Vizcaya, President Roxas, Capiz ang ila nga Punong Barangay bangud sa ginpahayag indi patas sa pagpanglista para sa ayuda sang mga naapektuhan sang mga bagyo nga nag-igo sa probinsya.
Ang ginpa-bombo amo si Punong Barangay Melchor Ubal.
Sa interview sang Bombo Radyo sa mga residente, partikular kay Cecilia Delmo, iya ginpahayag nga kaangay may pinili-an sa pagpanglista para sa ayuda.
Suno kay Delmo, indi patas ang pagpanglista bangud nga sila nga naggub-an sang puluy-an, sila pa ang wala sa lista apang ang indi naapektuhan amo pa ang nakabaton sang ayuda.
Pahayag pa sang iban nga mga residente, wala sila sang iban nga ginapangayo kundi ang maathagan kun ngaman subong sina ang natabo.
Nagpangayo naman sang pasaylo ang mga residente sa nasambit nga Punong Barangay, apang sa liwat ginpanindugan sang mga ini nga gusto lang nila sang patas nga sistema ilabi na kun may kaangtanan sa paayuda.
Interviewed by Bombo Francis Biñas
