ROXAS CITY -Nagdangop sa talatapan sang Criminal Investigation and Detection Group (CIDG)-Capiz ang duha ka mga barangay kawagad agud i-reklamo ang ila punong barangay angut sa gina-alegar kaltasanay sang Social Amelioration Program (SAP) sa Barangay Linao, Panay Capiz.
Ginpahayag ni Barangay Kagawad Alejandro Basilonia nga ginpangkaltasan sang tag-P950 ni Punong Barangay Tito Barnuevo ang P6,000 nga ayuda nga nabaton sang 159 ka mga benepisyaryo.
Magluwas dri, ginkaltasan man ni Barnuevo sang tag-P3,210 ang 21 ka mga lumon nga nakabaton man sang amo nga ayuda.
Suno kay Basilonia nga ginpahayag ni Barnuevo nga ang mga nakolekta nga kantidad ang igahatag sa 31 ka mga indibidwal nga wala nakabaton sang nasambit nga ayuda.
Apang nadismaya ini sang wala sang may mapakita ang nasambit nga punong barangay nga listahan sang ginatumod sini nga 31 ka mga indibidwal.
Samtang nagpamatuod naman ang isa ka benepisyaryo nga si Manong Roger nga isa siya sa ginkaltasan sang P950 sang amo nga punong barangay.
Ginpahayag sini nga nagpasugot siya nga kaltasan ang nabaton nga ayuda bangud ginpahog ini ni Barnuevo nga indi makabaton sang ayuda sa tion nga indi ini magpasugot.
Gindugang pa ni Manong Roger nga bilog nga pa nga P1,000 ang ginhatag sini bangud lunsay libuhon ang iya nabaton nga ayuda
