ROXAS CITY -Ginpanginwala sang punong barangay sang Barangay Tapulang, Maayon, Capiz ang alegasyon nga nagpamalabag ini sa gintalana kuntani nga distribusyon sang mga foodpacks sang provincial government pinaagi kay Atty. Atlas Catalan sa barangay hall kag sa Tapulang Elementary School.
Ini ang nangin sabat ni Punong Barangay Jovie “Dadoy” Deocampo sang mainterview sang Bombo Radyo.
Ginpahayag ni Deocampo nga wala ini nagpamalibad kay Barangay Kagawad Roy Dorado sang naglisensya ini nga usaron ang barangay hall kag nasambit nga buluthuan sa natalana nga distribusyon sang mga foodpacks.
Suno kay Deocampo nga wala sang pormal nga koordinasyon ang grupo ni Atty. Catalan sa konseho sang nasabit nga barangay angut sa distribusyon sang mga foodpacks kag kay Dorado lamang ginpaagi ang paglisensya.
Nagpangabay pa sini suno sa opisyal nga mahimo nga itugyan na lamang sa mga barangay health workers (BHWs) ang pagpanagtag sang mga foodpacks agud hugot nga ma-obserbar ang social distancing.
Gin-athag man sini nga wala ini nagapamulitika bangud kaayuhan sang mga residente ang ginapanumdum sini kag tuman kalayo pa ang eleksyon.
Ginpanginwala man ni Deocampo ang alegasyon nga ginmanduan ini ni Maayon Mayor Raymond Malapajo nga indi pagsugtan nga usaron ang barangay hall sa distribusyon sang foodpacks sang gobyerno probinsiyal.
