ROXAS CITY-Kumpyansa ang punong barangay sang Barangay Lonoy, Roxas City nga kwalipikado ang tanan nga mga nakabaton sang ayuda sa idalom sang Social Amelioration Program (SAP) sang Department of Social Welfare and Development (DSWD) sa ila barangay kabaliskaran sang mga reklamo nga ginpalab-ot sa Bombo Radyo.
Ginpanindugan ni punong barangay Ferdinand Valles nga kwalipikado sandig sa guidelines sang DSWD ang 410 ka mga benepisyaryo nga aktwal nga nakabaton sang tag P6, 000 nga ayuda.
Gindugang pa sini nga maid-id ini nga gin-validate sang barangay kag katapo sang DSWD apang aminado siya nga may mga pila ka mga residente nga nagreklamo sa barangay nga wala nakabaton sang nasambit nga ayuda.
Nagapati sa Valles nga nakahangop man ang mga wala nakabaton sang sila ang ginpaathagan sang mga katapo sang DSWD sa wala nila pagkalakip apang ginkatingala sini nga may nagtuhaw pa nga mga nagareklamo.
Samtang ginpanginwala ni Valles nga may mga himata siya nga nagbaton sang nasambit nga ayuda.
Aminado ini nga may barangay tanod kag himata sang mga barangay officials nga nakabaton sang bulig-pinansyal apang gin-athag ni Valles nga mga kwalipikado sila tanan para sa nasambit nga programa.
Handa naman si Valles nga atubangan sa tion nga imbestigaran sang DSWD ang mga reklamo batuk sa konseho sang barangay.
