ROXAS CITY – Ginsabat na ni Punong Barangay Rolando “Totong” Tuazon ang reklamo sang pila ka mga pumuluyo sa tuman ka baho nga tangkal sang baboy sa Barangay Lanot, Roxas City.
Suno kay Tuazon nga ginakatinguhaan naman sini nga mahitsu ang nasambit nga probema sa ila nga barangay.
Mahibaluan nga ginareklamo ang tuman ka baho ukon sungaw sang higku sang baboy nga ginapanag-iyahan ni Richard Bechayda.
Aminado ang opisyal nga nakalab-ot na sa iya talatapan ang nasambit nga reklamo kun sa diin nag promesa man ang ginareklamo nga i-pull-out ang apat ka baboy sa Disyembre 20.
Apang, napaslawan ini tubtob subong rason nga nagaantus sa gihapon ang mga residente malapit sa compound sang ginareklamo.
Samtang, nagpasalig naman ang opisyal nga ipatawag sini liwat ang ginareklamo kag tagreklamo agud maistoryahan kag mahitsu na ini nga isyu.
Matandaan nga may yara sang nagpalab-ot nga concerned citizen sa Bombo Radyo natuhoy sa nasambit nga problema.
