ROXAS CITY – Wala na sang suplay sang puti nga sibuyas sa probinsya sumugod pa sang Hunyo.
Ini ang ginkumpirmar ni Ms. Antonette Diaz, Price Monitoring In-Charge sang Office of the Provincial Agriculturist sang ma-interview sang Bombo Radyo.
Ba-se sa iya monitoring sa Teodoro Arcenas Trade Center (TATC), ginpabutyag sang mga vendors nga nagabaligya sang puti nga sibuyas nga wala na sila sang suplay bangud man sa wala na sang stocks ang ila suppliers/dealers.
Suno kay Diaz, may yara sang mga suppliers nga wala na sang stocks sa bulan sang Mayo kag sang Hunyo na ini nagkaubusan.
Gintuad suno diri sang suppliers sa ila ginasuplyan nga kabangdanan sa pagka-ubos sang ila suplay bangud wala sang permit ang importer.
Mahibaluan nga ang mayor nga suplay sang white onion imported ukon gikan pa sa iban nga pungsod.
May yara man suno diri sang available nga stocks sa syudad sang Manila apang nagalab-ot sa P550 kada kilo ang capital palang nga presyo kun sa diin ginakabig sang mga vendors nga masyado ka mahal, dugang pa nga gamay lang ang nagabakal sini sa ila partikular sa TATC.
Dugang pa ni Diaz, ginapahayag nga may yara sang una nagapananom sang puti nga sibuyas sa Pangasinan, apang nag-untat na ini bangud ginasapawan sila kun magdungan ang ila harvest sa importasyon kun sa diin mas barato ang baligyaanay.
Sa pihak nga bahin, suno kay Diaz bastante paman ang suplay sang iban nga ingrediente kapareho sang bawang, sibuyas nga pula, kag kamatis kag nagadepende ang mga presyo sini sa ila kalidad kag kadakuon.
Sa karon, ang bawang mabakal sa P90-P100, sibuyas nga pula P130-P135, kamatis P60-P70 kada kilo.
Ginpunto ni Diaz nga apektado ang fresh products kun may kalamidad ukon malain ang tiyempo ilabi na nga nagahilapit na ang BER months.
Panugyan sini sa tanan nga magtipid kag hulaton ang pagahimuon nga tikang sang gobyerno nasyunal angut sa mga ginakulang nga produkto bangud indi lang ang probinsya sang Capiz ang apektado kundi ang bug-os nga pungsod Pilipinas.
