Qualifying examination sa Capiz scholars, nagapadayon; interview, gindula agud malikawan ang pamulitika

ROXAS CITY – Nagapadayon sa karon ang qualifying examination para sa mga Capiz Scholars.

Sa interview sang Bombo Radyo kay Mr. Rovil Villasoto, coordinator sang Kabalaka Capiz Scholarship and Educational Assistance Program, suno diri nga ginsuguran na ang 2^nd batch sang pagpili sang mga masunod nga Capiz Scholars subong nga bulan sang Disyembre.

Ini matapos nga kadam-an na sa mga aplikante ang makaguwa na sa ila panimalay bangud nga fully vaccinated na.

Ginklaro sini nga ang mga nagakuha sa karon sang amu nga exam ang mga nag-apply sa bulan sang Marso, Abril kag Mayo.

Sa pihak nga bahin, ginpahayag ni Villasoto nga sang bulan sang Pebrero, sini nga tuig, gindesisyunan sang scholarship committee nga igapaiway ang interview nga porsyon sa mga aplikante agud malikawan ang pamulitika sa screening process.

Ini bangud ang naga-conduct sang interview nga miyembro sang komitiba ang pulitiko.