Naghatag sang emosyonal nga pagpasidungog si Rachel Alejandro sa iya amay nga si OPM icon Hajji Alejandro nga nagtaliwan sang Martes, Abril 22, sa edad nga 70 anyos.
Sa isa ka post sa Facebook, ginlaragway ni Rachel ang iya amay bilang “adlaw” sang ila pamilya, nga ila pirme ginapalibutan bangud sang iya kainit kag kasanag.
Dugang pa niya nga ginsaysay ang mga handumanan sang ila tion upod sa ila amay halin sa pagkabata tubtob sa katigulangon, kag kun paano sila padayon nga nagapangita sang iya presensya.
Suno kay Rachel, si Hajji wala sang talent manager kag talagsa lang nagagamit sang social media ukon PR, apang nangin madinalag-on bangud sa iya talento, pagpangabudlay, kag karisma. Ginasiling man nga wala niya ginapaiway ang mga palagwaon bisan pa nagabatyag sia sang balatian.
Nahibaluan sang publiko nga si Hajji may stage 4 colon cancer kag nagpaidalom sa operasyon sang Pebrero. Ginpili sang pamilya nga taguon ang iya balatian suno kay Rachel bangud nagalaum si Hajji nga makabalik na siya sa pag-perform.
Si Hajji Alejandro, nga natawo bilang Angelito Toledo Alejandro, isa ka kilala nga katapo sang Circus Band kag nangin bantog sa mga ambahanon nga “Kay Ganda ng Ating Musika,” “Panakip-butas,” kag “Tag-Araw, Tag-Ulan.”
