ROXAS CITY – Halangpon ang nangin sabat kag reaksyon sang punong barangay sang Barangay Tiza, sining syudad sa alegasyon nga pagpaarak sang luthang sa balay sang CEO sang 25 Days Double your Money Investment Scheme.
Sa exclusive interview sang Bombo Radyo kay Kapitan Alfredo ‘’Menong’’ Albaladejo, ginpahayag sini nga makaduluda ang gin-alegar sang kampo ni Junelyn Obamos Gregorio bangud wala sang may nakita nga empty shells sang armas nga gingamit sang ginaalegar suspek nga nagasakay sa motorsiklo.
Aminado ang opisyal nga yara sila sa barangay hall sang nabatian ang asud asod nga lupok sa diin gilayon nila ginpadulungan ang lugar agud tsekyaron ang natabo.
Sa ila pagtsekyar sa gate kag balay ni Gregorio wala sila sang nakita nga agi sang armas ukon empty shells sa lugar kundi kasubong nga ginbakbakan lamang ini sang matig-a nga bagay ang gate.
Naghatag pa sang pagduda kay Albaladejo nga posible drama drama lamang ang tanan agud paguwaon nga may pamahog sa ila kabuhi ang wala pagpa-blotter sa istasyon sang pulisya kag bisan sa ila barangay sang pamilya Gregorio.
Suno sa punong barangay nga normal nga reaksyon sang tawo nga paarakan sang luthang ang balay, amo ang magdangup sa mga kapulisan kag ituad ang natabo.
Apang sa kaso sang CEO sang 25 Days Double your Money Scheme, wala ini naghimo sang anuman nga tikang matapos ang ginaalegar pagpangluthang sa ila balay.
Samtang pananglitan nga matood gid man ang alegasyon sang nasambit nga pamilya, posible ang naghimo sini amo ang mga investors nga wala niya mabalikan sang ila nga investment.
