Ginpasaka na sang National Disaster Risk Reduction Management Council (NDRRMC) ang lebel sang alerto nagikan sa Blue Alert Status sa Red Alert Status bangud sa peligro nga dala sang Bagyo Crising sa pungsod.
Epektibo subong nga las 12:00 sang udto ang pagpasaka sang alerto nga ini sa bug-os nga pungsod.
Suno naman sa Memorandum no. 170 sang NDRRMC, ginamanduan sini ang mga nakaduty nga opisyal kag katapo nagikan sa Armed Forces of the Philippines (AFP), Bureau of Fire Protection (BFP), Philippine Coast Guard (PCG), Philippine National Police (PNP) kag mangin ang mga katapo nagikan sa mga technical staffs sang mga talatapan sang Department of Science and Technology-Philippine Atmospheric Geophysical and Astronomical Services Administration (DOST-PAGSA), Department of Interior and Local Government (DILG), Department of Social Welfare and Development (DSWD), Department of Agriculture (DA), kag pila pa ka mga katimbang nga ahensya nga maghatag sang bulig kag koordinasyon sa Operations Center para sa gilayon nga pagpalab-ot sang assistance sa mangin pagtama sang bagyo.
Samtang, sa idalom naman sang Red Alert Status, ginamanduan nga ang tanan nga ahensya sa idalom sang NDRRMC nga mangin alerto kag padayon nga nakabantay sa mga epekto sang malain nga tyempo sa pungsod kag sa mga komunidad.
