TAPAZ, CAPIZ – Gindeklarar nga Persona Non Grata sang Local government unit sang Tapaz ang Regional Director sang Department of Environment and Natural Resources Mines Geoscience Bureau (MGB) Region 6 nga si Cecilia Ochavn Saycon.
Sa interview sang Bombo Radyo kay Tapaz Mayor Roberto Nonong Palomar, nagpapasar sang resolution kag aprobado sang Sangguniang Bayan ang deklarasyon sang Persona Non Grata kay Saycon.
Suno kay Palomar nga nalab-utan na sang isa ka tuig kag lima ka bulan makaligad nga ang LGU nag-apply sang Industrial Sand and Gravel Permit (ISAG) sa region para makakuha sang bato kag balas sa mga kasubaan gikan sa lima ka mga barangay nga gamiton sa nagapadayon nga pagpasemento sa mga dalanon nga yara sa nabukid nga barangay.
Dugang pa ni Palomar nga nakumpleto naman nila ang tanan nga mga dokumento nga ginapangayo sang ahensya kag nabayaran ang kantidad nga masobra P400 mil apang wala sa gihapon naga issue sang permit para sa amu nga operasyon.
Pahayag pa sang alkalde nga indi pwede nga ma-delay ukon indi maimplementar ang programa sang gobyerno sa mga upland barangay kay kinahanglan ini sang mga pumuluyo nga makabulig solbar sang insurgency sa ila nga banwa.
Nagpasalig si Palomar nga ila dayunon ang pagkuha sang balas kag bato sa mga kasubaan apisar wala ang mga ini sang permit kag ginapasalig sa ila nga nagakunsulta pa ang region sa mangin desisyon sang central office.
