ROXAS CITY – Nabaton na sang regular nga mga empleyado sang provincial government ang ila nga cash gifts kag 13 month pay para sa bulan sang Disyembre, 2020.
Ini ang ginkompirmar ni Provincial Budget Officer Antonio Arbis sang mainterview sang Bombo Radyo.
Suno kay Arbis nga ginsulod na sa ila nga ATM ang ila cash gifts nga P5,000 kag isa ka bulan nila nga sweldo ukon ang ila 13 month pay.
Dugang pa sini nga may yara man sang P5,000 nga bonus ang mga casual employee.
Samtang, ginpasiguro man sini nga ang P25,000 sang mga regular employee nga Collective Negotiation Agreement ang mabaton man nila sa bulan sang Disyembre.
Nahibaluan nga ang budget sang ila NCA ang nagahalin sa saving sang Maintenance and Other Operating Expenses (MOOE).
Samtang, nakapatigayon naman sila sang executive budget hearing matapos nga gin-aprubahan na sang Provincial Development Council kag Sangguniang Panlalawigan ang pondo sang probinsya sa masunod nga tuig.
Ginpahayag ni Arbis nga may yara sang ginpangbuhinan nga mga departamento ang provincial board.
Magluwas diri, may yara sang gin-alokar nga pondo ang probinsya nga halos P33 million nagikan sa mga departamento para sa COVID-19 response kag bakuna.
