ROXAS CITY – Matigdas nga ginsiling ni SB Member Fernando Capapas sang banwa sang Sigma nga wala sang klaro ang ginreklamo sang duha ka Public Order Security Unit (POSU) official batuk sa iya may kaangtanan sa ginapahayag nga paglapas sini sa ordinansa nga illegal parking sa ila banwa.
Sa interview sang Bombo Radyo kay SB Capapas, ginsiling sini sang natabo ang amu nga isyu sadtong Mayo 23, 2024 mga 10:00 ukon 11:00 sang gab-i nagakaon sila sa isa ka kalan-an kaupod si Sigma Vice Mayor Christopher T. Andaya sang nagpalapit sa iya ang duha ka opisyal sang POSU kag ginsiling illegal parking ini.
Ginklaro man sang nasambit nga SB Member nga wala niya ginmulay ang mga opisyal kag sa pagkamatuod ginpamangkot lamang niya ang mga ini kung anu ang ila basehan nga nagapamatuod ginlapas sini ang amu nga ordinansa.
Suno diri nga indi man maayo nga dakpon lamang siya kag isyuhan sang ticket nga wala sang may nag-eksplekar sa iya.
Pagklaro sini nga wala sa perimeter ang iya salakyan agud nga hatagan sang penalidad bangud 60-70 meters ang kalayuon sini sa signage rason nga klaro para sa iya nga luwas kag mahimo diri nga magparking.
Ginpahayag man ni SB Capapas nga ginkakibot na lamang niya sang may nabaton na ini nga blotter report nagikan sa Sigma MPS kung sa diin, wala nakabutang kung anu ang iya ginbayolar rason agud makabatyag ini sang kaakig bangud suno diri magamay lamang ini nga butang kag kung tani sa baylo nga magreport mas maayo suno kay SB Capapas nga ginhinalaan na lamang ini kag gin-eksplekar sa iya kung anu nga ordinansa ang iya ginlapas bangud para sa iya wala ini sang kinahanglan nga bayaran bangud nahibaluan niya nga yara ini sa intsakto nga lugar.
Apisar nga gamay ukon dako nga kantidad man ang bayaran, indi ini magpaguha sang kwarta tubtob wala sang opisyal nga maga-istorya kag magapa-athag sa iya.
Ginbuyagyag man sang nasambit nga SB Member nga base sa ginpadala nga reminder letter sa iya nagikan sa Treasury Office sang ila banwa wala nakabutang kung pila ang iya bayaran kag ang nakabutang lamang diri ang obstruction kabaliktaran sa ginareklamo sang mga opisyales nga illegal parking.
Mahibaluan nga sa bahin sang Poblacion Sur ginadumilian nga magparking, loading kag unloading ang tanan nga mga pampasahero nga jeep kag cargo truck, samtang sa Poblacion Norte naman ginadumilian ang mga ini sa adlaw sang Miyerkules kag Sabado kung sa diin ini ang tinda ukon market day sang banwa.
Sa pihak sini, ginadayaw sini ang mga opisyales sang POSU bangud nagapakita ini nga wala sila sang may ginapili nga indibidwal kag ginahimo ang ila obligasyon apang ang indi lamang suno diri maayo kung paano sila mag-intindi sang ordinansa kag paano ini i-implementar.
Mensahe sini sa mga pumuluyo sa ila banwa nga indi paghatagan sang malisya ang nagalupok nga isyu subong batuk sa iya bangud gamay lamang ini nga indi pag-intindihanay bangud wala ini nagakontra sa ginapatuman nga ordinansa sang ila banwa kundi luyag lamang niya nga ipatuman ini sang instakto.
