ROXAS CITY – Ginsabat ni Jerrold Dela Torre SSC President sang Capiz State University Main Campus, ang mga reklamo sang pila ka mga estudyante angut sa penalidad sa tion nga mapaslawan ang mga ini nga maka-attend sa ila flag ceremony kada Lunes nga adlaw.
Sa interview sang Bombo Radyo kay Dela Torre, ginpahayag sini nga ang nasambit nga pagsuluktan una na nga ginapahibalo sa tanan nga mga estudyante kag wala man sang isa sa ila ang nagpamalabag diri.
Suno kay Dela Torre, bilang isa ka estudyante obligasyon nga mag-attend sang flag ceremony bangud kada isa lamang ini ka bes sa isa ka semana ginapatigayon.
Mahibaluan nga kada estudyante sa nasambit nga unibersidad obligado nga magbayad sang P5.00 sa tion nga mapaslawan nga mag-attend sang flag ceremony kag pananglitan nga indi ang mga ini magbayad mahimo sila nga magpangtinlo sa eskwelahan ukon community service.
Agud malikawan ang kaangay sini nga mga penalidad, ginsiling ni Dela Torre nga mas maayo mag-attend na lamang bangud katungdanan ini indi lamang bilang isa ka estudyante kundi bilang isa ka Filipino.
Gin-eksplekar man sini nga may yara sila sang resibo nga ginahatag sa mga estudyante sa tion nga sila ang magbayad kag ang kwarta nga ila natipon ginabulig man nila ini sa mga estudyante nga nagakinahanglan partikular sa mga napatyan bilang limos.
Mensahe sini sa mga estudyante sa amu nga eskwelahan, indi magduha-duha nga magpalapit sa ila opisina kung may yara sang mga pamangkot ukon concerns bangud handa sila nga magsabat.
