Naglab-ot sa pinakamataas nga balor ang kwarta nga ginapadala sang mga Overseas Filipino Worker (OFW) sang Disyembre 2025 base sa data sang Bangko Sentral ng Pilipinas.
Sa bulan sang Disyembre, naglab-ot sa $3.522 billion ang ginpadala nga kwarta, mas mataas sang 4.2% kun ipaanggid sang Disyembre 2024.
Kadam-an sa kwarta ang halin sa mga land-based worker nga nagpadala sang $2.83 billion, samtang $0.69 billion naman ang halin sa mga sea-based worker.
Bangud sini, ang kabug-osan nga remittances para sa bilog nga tuig sang 2025 ang naglab-ot sa record nga $35.634 billion, mas mataas sang 3.3% kun ipaanggid sang 2024.
Pinakadako nga ginhalinan sang padala ang Estados Unidos nga may 39.7%, ginasundan sang Singapore, Saudi Arabia, Japan, United Kingdom kag United Arab Emirates.
Samtang, ang kabug-osan nga personal remittances, lakip ang kwarta nga ginapadala sa cash ukon iban pa nga pamaagi, ang naglab-ot man sa record nga $36.619 billion sang 2025.
