Nagbalay sang resolusyon si Board Member Cesar Yap Jr. nga nagatuyo nga pabaskugon ang Information, Education, and Communication (IEC) campaign sa probinsya sang Capiz kontra sa mga balatian kaangay sang Hand, Foot and Mouth Disease (HFMD), waterborne diseases, influenza, leptospirosis, kag dengue.
Sa interview sang Bombo Radyo kay Board Member Yap, Chairman sang Committee on Health, iya ginpahayag nga dapat pa nga palaparon ang IEC campaigns agud mapabaskog ang kolaborasyon sa tunga sang PHO, LGUs, MHUs, barangay officials kag BHWs.
Suno sa Board Member, ang resolusyon ginpresentar sa ginpatigayon nga Health Committee hearing sa Provincial Capitol, kaupod sanday PHO head Dr. Alex Nolasco, Board Members Trina Almalbis Ignacio kag Cecilio Fecundo, kag iban pa nga miyembro sang talatapan.
Pahayag niya, gintutukan sang mga opisyal ang nagataas nga kaso sang HFMD sa probinsya, sa diin sandig sa data sang PHO, naglab-ot na sa 432 ka kaso, 700% ang pagsaka kun ipaanggid sa nagligad nga tuig. Dugang pa sang batungdan, may yara sang 5,600 ka Barangay Health Workers sa Capiz nga sarang gamiton bilang pwersa para sa padayon nga kampanya batok sa HFMD kag iban pa nga notifiable diseases.
