ROXAS CITY, CAPIZ- Ginaduso ni Capiz 1st District Board Member Dr. Cesar Yap Jr. sa Sangguniang Panlalawigan ang resolusyon sa pag-angkon sang mga otoridad sa probinsya sang Alcohol Breathe Analyzer.
Sa interview sang Bombo Radyo kay Yap, iya ginpahayag nga dako nga bulig ang alcohol breathe analyzer para sa tanan.
Suno sa iya, sandig sa datos sang mga kapulisan, yara na sa masobra 600 ang mga kaso sang traffic accidents ang nabalhag sa Capiz kag pila sa mga rason amo nga yara sa impluwensya sang makahulubog nga ilimnon ang mga driver.
Pahayag ni Yap, umpisa Enero tubtob Agosto 2025, may 17 ka mga indibidwal nga napatay sa aksidente sa dalanon. Gani, importante gid dugang sang board member nga may yara sang amo nga device agud malikawan ang aksidente sa dalanon.
Nahibaluan nga ang alcohol breathe analyzer ang isa ka modern nga kagamitan nga naga-measure sa lebel sang alkohol sa ginhawa sang isa ka tawo.
Interviewed by Bombo Francis Biñas
