ROXAS CITY – Padayon nga ginahulat sa karun sang Ivisan Municipal Police Station, ang resulta sang post mortem examination sang isa ka lalaki nga nasapawan-patay nga nagalutaw samtang nagakulob sa uyapad sang Barangay Ilaya, Ivisan Capiz.
Sa interview sang Bombo Radyo kay PMaj. Ruby Magallanes hepe sang Ivisan Municipal Police Station, ginpahayag sini nga suno sa amay sang biktima nga ginkilala kay alyas Ronie, 29-anyos kag residente sang nasambit nga lugar katapusan sini niya nga nakit-an ang iya bata sadtong Hulyo 11, takna alas 10:00 sang aga Huwebes nga adlaw sang naglisensya sa iya nga magpadulong sa peryahan sa amu nga lugar apang wala na ini nakapauli.
Suno kay Magallanes, agud matumod ang rason sang kamatayon sang biktima ginahulat pa nila ang resulta sang post mortem examination bangud wala sang may nakita nga mga pilas sa lawas sang bangkay bangud yara na ini sa state of decomposition.
Mensahe sini sa pumuluyo nga indi magkahangawa nga magpalapit sa ila talatapan ilabi na sa mga persona nga katapusan nga nakakita sa nasambit nga biktima.
