ROXAS CITY -Natalana nga ipatawag sang Sangguniang Panlalawigan ang OIC-Chief of Hospital sang Roxas Memorial Provincial Hospital ukon RMPH agud usisaon ang rason sa likod sa tuman nga atrasado nga sweldo sang mga contractual kag mga job order employees sang Roxas Memorial Provincial Hospital.
Ini ang ginpahayag ni Board Member Jonathan Sonny Besa, Chairman sang Committee on Finance and Appropriation sang provincial board sang mainterview sang Bombo Radyo.
Ginpahayag ni Besa nga ipatawag sang SP si Dr. Edmarie Tormon sa natalana nga committee hearing sang konseho agud usisaon ang rason sa likod sang pagka-atrasar sang halos tatlo nga bulan nga sweldo sang mga empleyado sang nasambit nga ospital.
Aminado si Besa nga nakibot sila sa amo nga reklamo bangud available naman ang masobra P20 milyones nga pondo para sa sweldo sang mga contractual kag mga job order employees.
Samtang indi naman kumbinsido sa Besa sa rason ni Budget Officer Antonio Arbis sa pagka-atrasar sang sweldo nga ginahulat pa nga maaprubahan ang increase sa sweldo sang mga empleyado sang nasambit nga ospital.
Suno sa kay Besa nga sang bulan pa sang Abril naghinyo sang increase sa sweldo ang pamunuan sang RMPH kasunod sang enhanced community quarantine apang kuwestiyunable suno sa iya ang pagka-atrasar sang sweldo sa bulan sang Pebrero kag Marso.
