Robbery hold up, ginapahayag nagluntad sa National Highway nga sakop sang Barangay Sta. Fe, Pilar, Capiz kaina sang aga takna alas-9:55 sang aga, Enero 5, 2025.
Ginkilala ang mga biktima nga sanday Jorge Valsote Ulega, 48-anyos kag residente sang Brgy. Pob. Tabuc, Panay, Daniel Acervo Lava, 35-anyos kag residente sang Brgy. Parian, Sigma, kag Jose Billones, 57-anyos kag residente sang Brgy. Tanza Sur, Panay nga lunsay mga driver sang isa ka kumpanya sang softdrinks.
Sa nakuha nga impormasyon sang Bombo Radyo nagikan sa Pilar PNP, ginapahayag nga ginamaneho ni Ulega ang salakyan nga Innova kaupod ang duha sini ka mga kaupdanan gikan sa Balasan, Iloilo kun sa diin padulong kuntani ang mga ini sa banwa sang Panay.
Apang, samtang ginasubay sang mga ini ang national highway sa Brgy. Sta. Fe, Pilar, ginharangan kag ginpauntat ang mga ini sang tatlo ka mga wala makilan-an nga kalalakinhan nga nakasuksok sang Police Athletic Uniform kag ini sila ang gintutukan sang caliber .45 pistol nga armas-luthang.
Ginapahayag nga madasig nga nagsulod ang tatlo ka mga suspetsado sa amo nga salakyan kag pwerse nga gintaban ang sa mas ukon menus P1 milyon nga balor sang kwarta, cellphones, yabi sang salakyan, kag iban pa.
Madasig naman nga nakapalagyo ang mga suspetsado padulong sa direksyon sa banwa sang Pres. Roxas sakay sang isa ka Mitsubishi Mirage nga nagaduag silver gray nga ang punta sang plate number nga 8971.
Sa karon, nagapatigayon na ang Pilar PNP sang hot pursuit operation agud madakpan ang mga suspetsado.
