Ginpanginwala sang anay tigpamaba sang presidente nga si Atty.Harry Roque ang mga alegasyon nga nagapasilabot siya sa dalagan sang kaso ni anay Presidente Rodrigo Roa Duterte sa ICC.
Una nga naglupok ang isyu matapos nga ginpahayag sang legal counsel ni Duterte nga si Atty. Nicholas Kaufman, naghimo sang pahayag sa isa ka nasulat nga interview.
Nahibaluan nga gina-alegar nagatrabaho si Roque agud kasuhan ang gobyerno sang Dutch bangud sa pag-detain kay FPRRD sa The Hague, Netherlands.
Gintawag pa ini sang abogado nga “crazy scheme” bangud ini nga mga tikang ang sigurado nga magapabudlay sa kaso sang ila kliyente.
Mas importante suno sa iya nga magkooperar sa Dutch Government sa baylo nga kasuhan ini agud nga ihatag sang korte ang ila interim release request.
Sa pihak nga bahin, gin-athag ni Roque nga wala siya nagapahilabot sa kaso sang anay Presidente ukon nagapagwa sang statement nga makaapekto sa legal strategy sang iya legal team.
Suno sa iya, kaangay lang siya sang iban nga supporters sang anay Presidente nga luyag nga magbalik ini sa Pilipinas.
Sa pihak sini, ginpasalig ni Roque nga magapabilin ang iya suporta sa Legal Defense team sang anay presidente.
