ROXAS CITY – Dako ang mabulig sang Reserve Officers Training Corps (ROTC) sa kabuhi sang isa ka estudyante bangud nagapansanyog ini sang self confidence, disiplina kag respeto.
Ini ang ginpahayag ni Dr. Wennie Legario, ROTC Commandant sang Capiz State University (CapSU) sang mainterview sang Bombo Radyo.
Suno diri, indi dapat nga kahadlukan ang pag-enrol sa ROTC bangud madamo sang bentaha nga makuha nga posible makuha diri.
Ginpahayag ni Legario nga indi lamang military training ang sentro sang ROTC kundi ginahatagan man sang importansya ang patriotism kag environmental protection.
Kalakip sa ginatudlo amo ang personal hygiene, drug education kag kun pano ma survive ang isa ka kalamidad kun sa din ginatambongan ini sang nagkalain-lain nga ahensya kasubong sang PDEA, BFP, PDRRMO, Philvocs, Red Cross kag iban pa.
Dugang pa sang opisyal, nga posible isa ini ka factor sa pagdihon sang personalidad sang mga kabataan.
Ba-se sa RA 9163 ukon National Service Training Program (NSTP) Act of 2001 nakasaad, nga kinahanglan makumpleto sang estudyante ang 60 – 90 ka oras kada semester.
Mahibaluan nga ang CapSU, may yara sang masobra 2,200 ka ROTC nga mga estudyante kag pinakamadamo sa bug-os nga rehiyon sang Western Visayas.
