ROXAS CITY – Pabor nga himuon nga mandatory ang Reserve Officers Training Corps (ROTC) sa Grades 11 kag 12 nga mga estudyante sa pampubliko kag pribado nga mga eskwelahan sa pungsod.
Suno kay Wennie Legario ROTC program director sang Capiz State University nga wala ini sang nakita nga problema magluwas lamang kun paano ma-implementar ang sistema.
Ini sandig sa Republic Act 9163 ukon an act establishing the national service training program (NSTP) nga may yara sang ginabasehan nga module sa diin gina-eksplikar sa mga estudyante ang tatlo ka mga component ang ROTC, CWTS kag LTS.
Dugang pa sini nga 60% sang mga kababainhan ang nagpasakop sa ROTC.
Nagapati si Legario nga wala sang malain sa nasambit nga hagna sa baylo makabulig pa ini sa pagtuon sang mga estudyante.
Ang ROTC suno kay Legario ang isa ka programa agud nga mahanas ang mga estudyante sa ginatawag nga nationalism, patriotism, disiplina, responsibilidad, good values kag pagsunod sa layi.
Nahibaluan nga sa nasambit nga hagna requirement ang ROTC agud maka-gradwar ang mga estudyante magluwas lamang sa mga physically ukon psychologically unfit kag mga kabahin sang varcity team sang eskwelahan.
Matandaan nga gin-aprubahan na sang House of Representatives sa ikatatlo kag pinal nga pagbasa ang nasambit nga hagna.
