ROXAS CITY, CAPIZ- Nagpatigayon ang Bureau of Jail Management and Penology (BJMP) – Roxas City District Jail, sang isa ka “random” drug testing para sa tanan nga Persons Deprived of Liberty (PDLs) kag mga jail personnel bilang kabahin sang ila padayon nga kampanya batok sa ilegal nga droga kag pagsiguro sang “drug-free” nga pasilidad.
Sa interview sang Bombo Radyo kay Jail Superintendent Julius Cesar V. Chavez, City Jail Warden sang Roxas City District Jail, iya ginpahayag nga ang aktibidad ginpatuman upod sa koordinasyon sang City Health Office kag sang Philippine Drug Enforcement Agency (PDEA) – Capiz agud masiguro ang integridad kag kredibilidad sang resulta.
Ginpasiguro ni chavez nga ang drug test wala gin-anunsyo sa mga PDLs kag personnel agud malikawan ang bisan ano nga preparasyon ukon paglikaw.
Dugang pa sini, ang tanan nga samples sang ihi ginkuha kag gindala sa accredited nga laboratory para sa tampad kag husto nga resulta. Ang amo nga aktibidad isa lang sa pila ka mga ginapatuman nga “preventive measures” sang BJMP agud mapabilin nga luwas sa iligal nga droga ang sulod sang pasilidad.
Nahibaluan nga ang nasambit nga tikang nagapakita sang panindugan sang ahensya nga wala sang ginapaboran kag tananb kinahanglan nga magsunod sa layi, apisar nga mga empleyado pa ini sila.
Samtang ginpahayag man sang Jail Warden nga drug-free ang ila facility.
Nagpalab-ot man sang pagpasalamat ang BJMP sa mga ahensya kag stakeholders nga nagabulig sa ila misyon nga maghatag sang luwas, limpyo kag husto nga serbisyo para sa mga PDLs kag publiko.
In an interview with Bombo Jessa Mae Siman De Los Santos
