ROXAS CITY, CAPIZ – Gin-anunsyo ni Mr. Gilbert Fernando, head sang Roxas City Disaster Risk Reduction and Management Office (DRRMO), nga aktibo na ang Emergency Operations Center sang syudad sa idalom sang Code Blue.
Ang Code Blue amo ang kabahin sang local government disaster protocols nga naga-signal sang risgo sang posible pagbaha kag landslide bangud sa pag-ulan.
Suno kay Fernando, gina-monitor na sang CDRRMO ang lakat sang panahon sa diin nakabutang nga 100-200 mm sang ulan ang mahimo mag-apekto sa Roxas City.
Pahayag niya, bilang pagpanghanda, ginaplano na ang preemptive evacuations sa mga barangay nga masami ginabaha kag nagapakig-angot naman ang talatapan sa mga concerned agencies agud masigiuro ang kahandaan sa tanan nga lebel.
Ginaabisohan man sini ang publiko nga magpabilin nga alerto, i-monitor ang weather updates kag sundon ang mga guidelines kag abiso halin sa local government authorities.
