ROXAS CITY, CAPIZ- Nakahanda kag preparado nga mag-atubang sa imbestigasyon ang Roxas City Government sa panawagan ni Board Member Jose Fulgencio “Pepe” Del Rosario natuhoy sa rason sang pagbaha nga naeksperyensyahan sa syudad sang Roxas kag iban pa nga mga kabanwahanan sa prrobinsya.
Sa interview sang Bombo Radyo kay Mr. Melvin Galagate, Head sang Roxas City Communications Group (RCCG), iya ginpahayag nga handa mag-comply ang city government pananglitan matabo ang luyag nga imbestigasyon ni Del Rosario.
Suno kay Galagate, antes nagpungko si Roxas City Mayor Ronnie Dadivas, problema na ini nga ginapangatubang sang nauna nga administrasyon.
Pahayag nya, kaangay nga kalain sa isa ka honorable ang mga ginbuy-an sini nga mga tinaga bangud nga indi lamang ang syudad sang Roxas ang ginbaha kundi pati man ang pila ka mga banwa nga yara pa sa upland areas.
Samtang, hugot nga ginpanindugan ni Galagate nga ang mga panimangod ni Board Member Jose Fulgencio “Pepe” Del Rosario kay Mayor Ronnie Dadivas nga nagtinir lang ini sa ila nga balay sang tion sang pagbaha ang wala sang kamatuuran kag kaangay pagpangyaguta.
Dugang pa sang natungdan, ang rason sang tuman nga pagbaha nga naeksperyensyahan sa syudad amo ang pagbubo sang heavy rain nga katumbas sa isa ka bulan ang volume.
Ginsiling man ni Galagate nga wala nagkatulog kag nagtinir sa ila nga balay ang alkalde sang tion sang pagbaha bangud nga apisar hanagob na padayon ini nga nakigkoordinar sa mga barangay pamaagi sa personal sini nga pagpadulong nga makita naman sa mga laragway.
Interviewed by Bombo Francis Biñas
