Ginkabig sang Roxas City Government nga isa ka dako nga kadalag-an ang pagdesignate sang syudad bilang dugang nga testing center para sa September 2026 Licensure Examination for Professional Teachers.
Una nga nagpadala sang request ang Office of the City Mayor nga himuon nga testing venue ang Roxas City kag gilayon nga ginrekomendar man sang Professional Regulation Commission Iloilo ang approval sang request agud ma-accommodate ang mga examinees halin sa kalapit nga mga lugar kag malikawan ang malawig nga biyahe.
Sa interview sang Bombo Radyo kay Melvin Galagate, head sang Roxas City Communications Group, iya ginpahayag nga kaya sang mga pampubliko nga eskwelahan sa syudad nga ma-akomodar ang prospective 1,341 ka mga examinees.
Suno kay Galagate, tuman ini ka dako nga bulig para sa mga pumuluyo sang Capiz ilabi na sa mga ma-take sang exam, bangud malikawan na nila ang magbiyahe pa sa iban nga probinsya.
Sandig sa Resolution No. 2174 series of 2026 sang Professional Regulation Commission, opisyal nga gindugang ang Roxas City bilang testing center para sa exam nga natalana sa Setyembre 20, 2026.
