Natalana nga makighinun-anon ang Roxas City Government sa mga owners sang mga stall vendors sa Barangay Dayao, agud mapangitaan sila sang insakto nga pwesto para sa ila palangabuhian.
Ini kasunod sa ginpatigayon nga joint clearing operation batok sa mga manugbaligya sa circumferential road sang nasambit nga barangay.
Sa interview sang Bombo Radyo kay Melvin Galagate, head sang Roxas City Communication Group, iya ginpahayag nga ginahingyo sang syudad ang mga vendors nga mag-coordinate sa ila agud mapangitaan sang alternatibo nga pwesto.
Dugang pa ni Galagate, kinahanglan gid nga sundon sang tanan ang mga rules kag regulations nga ginapatuman sang syudad, ilabi na sang mga vendors.
Base sa imbestigasyon, natukiban nga kalabanan sa mga vendors sa lugar ang wala sang nagakaigo nga business permits.
