ROXAS CITY, CAPIZ- Nagpahanumdom ang alkalde sang Roxas City, Capiz sa mga pumuluyo nga mangin aligmat kag maghalong para sa palaabuton nga Bagyo Tino nga yara na sa subong sa sulod sang Philippine Area of Responsibility (PAR).
Sa interview sang Bombo Radyo kay Mayor Ronnie Dadivas sang Roxas City, iya ginpahayag nga kahapon nga adlaw sang Dominggo, Nobyembre 2, nagpatigayon ang ila nga talatapan sang emergency meeting kaupod ang City Disaster Risk Reduction Management Council, government agencies, department heads kag Barangay Officials.
Suno kay Dadivas, sa nasambit nga pagsinapol, ginhinalaan ang mga preventive measures kag precautionary agud masiguro ang kaluwasan sang tagsa ka mga pumuluyo sang syudad.
Pahayag nya, mas ginpahugot pagid ang pagmonitor indi lamang sa mga low-lying areas kundi pati man sa mga coastal areas sang syudad.
Nahibaluan nga naka-prepositioned na ang tanan nga mga family food packs para sa mga evacuees sa tagsa ka mga evacuation centers.
Nagapanawagan naman ang natungdan sa mga pumuluyo nga sa tion nga ginaabisuhan na nga magpatigayon sang preemptive evacuation, tumanon ini kag indi na magpakatig-a pa agud malikawan ang casualty tuga sang amo nga bagyo.
Interviewed by Bombo Jessa Mae Siman De Los Santos
