ROXAS CITY, CAPIZ- Ginpatpat sang tigpamaba sang Roxas City Police Station ang mga nagkalain-lain nga mga kaso nga nabalhag sang ila nga talatapan sa Roxas City, Capiz halin Mayo 10 tubtob Setyembre 14, 2025.
Sa interview sang Bombo Radyo kay Police Chief Master Sergeant Ramil Arcangeles, tigpamaba sang Roxas City Police Station, iya ginpakigabahin nga sumugod nga nagpungko ang bag-o nga hepe sang ila istasyon nga si Police Lieutenant Colonel Ricardo Jomuad Jr., may yara sang 274 tanan ka mga ka nagkalain-lain nga kaso kag estado ang ila nga istasyon sa diin ginakalakipan ini sang 70 ka mga filed cases, 21 ka mga pending cases kag 183 ka mga nag-execute sang affidavit of non-interest.
Magluwas diri, nakapatigayon man sila sang tatlo (3) ka mga operasyon may kaangtanan sa paglapas sa Presidential Decree 1602 ukon ang pagpatigayon sang illegal gambling.
Nagapadayon man suno sa iya ang ila nga mga operasyon sa Republic Act 9165 ukon “Comprehensive Dangerous Drugs Act of 2002” kag Republic Act 10591 ukon “Comprehensive Firearms and Ammunition Regulation Act.”
Bangud sa bulig kag suporta sang lokal nga gobyerno, mga barangay officials kag mga pumuluyo sang syudad, natigayon nga magkaladakpan ang mga indibidwal nga nagahimo sang kalainan sa palibot.
Samtang, nagapadayon ang mga nagkalain-lain nga mga programa sang talatapan kaangay sang pagpanagtag sang mga informative pamphlets sa mga pumuluyo, pag-conduct sang symposium, kag baranggay visitation. Isa pagid ka programa ang sa karon nga ila ginapabaskog amo ang programa nga inisyatibo sang Philippine National Police nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone kag sa sulod sang lima ka minuto ila pagarespondehan.
Pahayag pa ni De Leon, pamaagi sa pagbinuligay sang mga otoridad, lokal nga gobyerno kag mga pumuluyo naagaresulta sa paging madinalag-on ang mga programa sang kapulisan.
Lauman naman suno sa iya nga magapadayon ang tanan nga mga aktibidad sang mga katapo sang Roxas City Police Station agud mapabilin ang kalinong kag katawhay sa palibot sang syudad.
Interviewed by Bombo Francis Biñas and Bombo Sunnie Mae Batencila
