ROXAS CITY – Preparado na ang katapo sang kapulisan gikan sa Roxas Component City Police Station (RCCPS) para sa palaabuton nga pagbukas sang klase sa Lunes, Agosto 22.
Ini ang ginpahayag ni PLt.Col. Aron Palomo, Hepe sang Roxas City PNP sang mainterview sang Bombo Radyo.
Nagpatigayon suno diri sang instruksion subong nga adlaw si Provincial Director PCol. Winston De Belen kaupod ang Department of Education (DepEd) sa mga kapulisan natuhoy sa ila mangin preparasyon.
Kabahin diri ang pagdeploy sang mga kapulisan sa mga mayor nga dalanon agud mag-asister sa Traffic Manangement Unit (TMU) kag sa tagsa ka buluthoan ilabi na ang mga dalagkuan agud mapabilin sa gihapon ang kalinong kag katawhay sang syudad.
Sa pihak nga bahin, ginsiling ni Palomo nga ang Doña Emiliana Memorial Elementary School ang napilian sang ila programa nga “Adopt a School Program” kun sa diin nagpanghatag sila sang bag, school supplies, kag tsinelas sa 45 ka mga benepisiaryo nga estudyante, may tema ini nga Notebook, Ballpen kag Iban pa, para sa Masanag nga Bwas Damlag sang mga Kabataan”.
Luyag sini ipalab-ot sa mga ginikanan nga tudluan ang ila kabataan nga mangin responsible, mangin alerto sa palibot kag likawan maggamit sang cellphone ilabi na kun magtabok, kag mag-obserbar sang minimum health protocols.
