Ginpabutyag ni Russian Foreign Minister Sergey Lavrov ang kahandaan sang Russia nga buligan ang 11 ka mga miyembro sang Association of Southeast Asian Nations (ASEAN) sa krisis sa langis tuga sang giyera sa Middle East.
Suno sa embahada sang Pilipinas sa Russia, ini nga mensahe ginpalab-ot ni Lavrov sa ASEAN envoys sa isa ka sinapol nga ginpangunahan ni Philippine Ambassador sa Moscow nga si Igor Bailen, nga chairman sang ASEAN Moscow Committee (AMC).
Gin-istoryahan nila ang sitwasyon subong sa Middle East, ang posisyon sang Russia, kag ang mga tikang agud makakita sang solusyon nga mabaton sang tanan nga partido.
Ginpasalig man ni Lavrov ang suporta sang Russia para sa madasig nga kinahanglanon sa enerhiya sang mga pungsod sa ASEAN, lakip na ang langis, kag ginpamatud-an liwat ang suporta sa pagkasentro sang ASEAN sa pagpasanyog sang mabakod nga seguridad kag kooperasyon sa Asia-Pacific, nga may pagtahod sa internasyonal nga kasuguan, pagkapatas, kag pagkabukas.
Samtang, ang sole refinery sang Pilipinas nakakuha sang halos 2.5 million ka bariles sang krudo sang Russia agud mapun-an ang madasig sini nga nagakaubos nga suplay sang gatong, samtang padayon nga nagataas ang presyo sang langis bangud sa temporaryo nga pagsirado sang Strait of Hormuz.
