CAPIZ – Nagpanugyan ang Capiz Provincial Health Office sa publiko nga saulogun ang New Year sang safe kag likawan ang paggamit sang delikado nga mga palupok.
Sa interview sang Bombo Radyo kay Provincial Health Officer II Dr. Alex Nolasco, iya ginpahayag nga madamo sang tawo ilabi na kabataan ang nagakapilasan kada New Year tuga sang palupok.
Nagpaandam ang natungdan nga ang palupok ang mahimo magtuga sang injuries kaangay sang pagkapaso, pagka-utod sang tudlo, pagkabulag kag mangin pagkapatay.
Gina-engganyo ni Dr. Nolasco ang kada pamilya nga maggamit sang mas safe nga aternatibo nga makatuga sang gahod kaangay sang torotot, pito ukon mangin taklob sang kaldero.
Naghingyo ang natungdan sa mga Capizeño nga magsaulog sang bag-ong tuig nga malipayon, safe kag injury-free.
