Mga kabombo! Isa ka bala sa mga nagagamit sang ChatGPT nga isa ka artificial intelligence?
Aba, ang pamangkot: maabot kaman bala sa punto nga ipangalan mo ini sa imo bata?
Isa ka pamilya sa Colombia ang nagpukaw sang atensyon kag nag-umpisa sang diskusyon sa social media matapos nga ginpangalanan nila ang ila bag-o bung-ag nga anak nga babayi nga si “Chat Yipiti”.
Depensa sang ginikanan, ang pagpili nila sang sini nga ngalan isa kuno ka “tribute” ukon pagsaludo sa nagakatabo subong nga panahon sang artificial intelligence.
Opisyal nga narehistro ang ngalan sa National Registry Office sa banwa sang Cereté nga wala sang bisan ano nga pagpugong.
Apang, ginpakamalaot sang mga netizens ang ngalan kag nagpahayag sang pagkabalaka sa posible nga epekto sini sa kabata-an sa palaabuton, pareho sang bullying.
Suno sa report, indi na bag-o sa Colombia ang pagparehistro sang mga lain-lain nga ngalan nga indi kinaandan.
Daan na nga may ara sang mga ngalan nga halin sa mga kilala nga personalidad, pareho sang “Maicol Yordan” halin sa sikat nga basketball player nga si Michael Jordan, kag “Brayan Spears” nga halin naman kay Britney Spears.
Bisan pa nga may yara sang layi sa Colombia nga nagapahanugot sa mga registrar nga indi pagbatonon ang mga ngalan nga makadulot sang kahuy-anan ukon makalapas sa dignidad sang bata pareho sang “Miperro” nga ang buot silingon sa Spanish amo ang “Akon Ido” kag “Satanas.”
Tungod sini, nagpahayag man sang pagkabalaka ang mga eksperto sa child psychology.
Suno sa ila, ang isa ka tumalagsahon nga ngalan posible maka-apekto sa self-esteem kag emosyonal nga kahimtangan sang isa ka bata samtang nagadako ini.
