Pormal na nga gin-lunsyar ang Sanyog K.A.P.I.S. Project sang Department of Labor and Employment sa partnership sang Capiz Police Provincial Office kag Convergence of AMOMA Stakeholders sa Camp Apil, Lanot, Roxas City.
Ginapangunahan sang mga katapo sang DOLE, kaupod ang mga partner agencies kag mga otoridad ang nasambit nga kahiwatan.
Suno kay PLTCOL. Ricardo Jomuad Jr., Force Commander sang 1st Capiz Police Mobile Force Company, ginpahayag nga ang Sanyog KAPIS Project ang may katuyuan nga Sanyogon ang Pangabuhian sang Kabataan, Agrikultura, Panagat, Industriya, kag Siyensya sa probinsya sang Capiz.
Dugang pa sini, nga magluwas sa katuyuan nga pangabuy-anan, isa man ini ka stratehiya sa pagtapna sang nanari-sari nga sahi sang kriminalidad sa aton nga palibot.
Mahibaluan, nga base sa ila sini nga pag-monitor man sa tagsa ka mga kabarangayan sa probinsya, masami may nagapahayag nga mga pumuluyo nga may nagakahinabo nga mga kriminalidad sa ila nga lugar.
Kadungan sang sini nga kahiwatan, sa pihak nga bahin, nag-angkon man sang nagkalain-lain nga kantidad ang pila ka mga kooperatiba nagikan sa pila man ka mga kabaranggayan sang probinsya sang Capiz nga gin-alokar para sa ila sang DOLE kag DSWD nga may kabug-usan nga balor nga P15, 558,000.00.
Samtang, ginasiguro sang mga otoridad nga magabulig sila sa pag-monitor sa dalagan sang mga proyekto nga ginhatagan sang pondo sang nasambit nga ahensya.
