ROXAS CITY – Pagabuksan na sa publiko sang LGU Sapian ang ila kaugalingon nga bersyon sa pagsaulog sang Christmas season, ang ‘Sapian Dreamland’ buwas nga adlaw, Nobyembre 25, alas 5-sa hapon, sa Sapian Public Plaza.
Mahibaluan nga ang ‘Sapian Dreamland’ ang ginba-se sa Disneyland kun sa diin ginpreparar ang maduagon nga Christmas lights, dekorasyon, carnival rides kag may yara man sang dreamland walk.
Magluwas diri, sarang man nga magkaon sang street foods samtang naga-enjoy sa manami nga talan-awon kag ginapatukar nga Christmas songs.
Suno kay Atty. Joe Villanueva, alkalde sang nasambit nga banwa, tinutuyo sang nasambit nga kahiwatan nga maghatag sang kasadya kag kalingawan sa mga pumuluyo ilabi na sa mga Sapianon.
Nagapati si Villanueva, sa pihak sang naeksperensyahan nga paghangkat kasubong sang pandemiya, red tide kag pagpanalasa sang bagyong Paeng, maga-abot sa gihapon ang kasanag agud iwagan ang aton dalan.
Gina-imbitar sang alkalde ang tanan nga Sapianon kag kaiping nga banwa sa probinsya sang Capiz nga magpadulong sa ila banwa agud saksihan ang ‘Sapian Dreamland’ samtang nagahilapit ang adlaw sang Paskwa.
