Indi dapat pagdulaon ang posibilidad nga mag-tandem sanday Sara-Imee kag Leni-Risa sa 2028 Presidential kag Local Elections, suno kay Former Budget Secretary kag Liberal Party member nga si Florencio Abad.
Kasunod ini sang deklarasyon ni VP Sara Duterte nga magapadalagan siya bilang presidente sa palaabuton nga eleksyon.
Suno kay Abad, indi malayo nga magdesisyon sanday VP Sara kag Sen.Imee Marcos nga magpadalagan bilang tandem para sa masunod nga eleksyon.
Ginpahayag man sini nga mahimo man nga magpadalagan liwat sa pagka-presidente si Former Vice President Leni Robredo, kag posible pilion si Sen.Risa Hontiveros bilang iya tandem.
Dugang pa ni abad, nagapabilin ang desisyon ni Leni nga makakuha sang national position, apang suno sa iya, madamo sang matabo sa sulod sang duha ka tuig.
Kon indi ini matabo, mahimo man suno sa iya nga mangin standard bearer sang oposisyon si Sen Hontiveros, ilabi na nga ginpakita na sang senador ang iya ikasarang sa mataas nga kamara.
Pahayag pa ni Abad, ang senador ang may ikasarang sa pagpanguna, pareho sa posisyon sang President kag Vice President.
Matandaan nga una na nga ginpahayag ni Senator Robin Padilla nga Handa si Sen. Imee Marcos nga mangin ‘forever running mate’ ni VP Sara Duterte kasunod sang iya deklarasyon sang nagligad nga adlaw, Febrero, 18.
