ROXAS CITY – Magapadayon ang scholarship program sang gobyerno probinsiyal sa administrasyon ni Capiz Governor Esteban Evan Nonoy Contreras apang pagabuhinan lamang ang numero sang mga scholars.
Ginpahayag ni provincial administrator Dr. Edwin Monares, nga magapadayon ang commitment sang gobernador nga buligan nga maka-eskwela ang mga pigado apang deserving nga mga estudyante.
Apang hawhawon ukon buhinan ang naglab-ot sa 5mil ka mga scholars sang gobyerno probinsiyal nga sa ila pagpati nadula na ang pagsunod sa proseso sang kwalipikasyon bangud may yara sang lamud pamulitika ang pag-akomodar diri.
Nagapati ang opisyal nga indi masustenir sang gobyerno probinsiyal ang kasubong kadaku nga numero sang mga scholars.
Plano sa karon nga i-reprogram ukon amyendahan ang pagsulundan sang nasambit nga scholarship program kag pilion ang mga estudyante nga kwalipikado sa programa.
Nahibaluan nga may pondo nga P11 milyones ang scholarship program sang gobyerno probinsiyal sa idalum sang administrasyon ni anay Governor Antonio del Rosario kag P9 milyones ang nagamit nga ginbayad sa 1st kag 2nd semester sang school year 2018.
Ang nabilin nga P2 milyones nga pondo ang dugangan sang administrasyon ni Governor Contreras sang P3 milyones pinaagi sa supplemental budget.
