ROXAS CITY – Liwat nga igabalik sang andministrasyon ni Gov. Fredenil Castro ang scholarship program sa probinsya sang Capiz sa bag-o nga pangalan nga Capiz Scholarship and Educational Assistance Program (CSEAP).
Ini ang ginpahayag ni Hon. Thea Faith Reyes, Board Member kag Chairman sang Committee on Education sang mainterview sang Bombo Radyo.
Suno diri, madamo na ang nakagradwar sa mga nakaligad nga scholars gani nagakadapat nga pun-on ang mga bakante nga slots agud mahatagan tsansa ang luyag magpasakop sa nasambit nga programa.
Sa pihak nga bahin, gintuad ni BM Reyes nga ila natukiban ang iregularidad sa nakaligad nga adminitrasyon matapos wala sila ginhatagan sang mga dokumento nga magapakita sang listahan ukon pangalan sang scholars.
Nahibaluan nga 2,533 ang kabug-usan nga scholars ang ila nakita sa vouchers kag payroll kun sa diin 1,234 ang nagikan sa kabalaka scholars sa administrasyon ni Contraras samtang 1,299 naman ang nagikan sa aksyon agad sa administrasyon ni Del Rosario kun sa diin 90% na diri ang nakagradwar.
Gintuad pa sang opisyal nga 1,514 diri ang lakip sa “merit private” (diritso ang bayad sa bulutho-an) kun sa diin labaw sa ordinansa nga dapat 250 lamang samtang wala naman dokumento para sa “merit public” (scholars nga naga eskwela sa unibersidad ukon pampubliko nga bulutho-an).
Samtang sa special courses nga in demand kag ginakinahanglan sang probinsya kaangay sang environmental management, fisheries, agriculture, veterinary medicine, 49 lamang ang yara sa listahan nga nakuha nga dapat 125 kun sa diin magabaton kuntani sang P10,000 kada tuig mapapribado man ukon publiko nga eskwelahan.
Natukiban man nila nga 36 ka bilog nga mga kabataan ang dapat yara nalakip sa special courses apang nalagbong lamang sa educational financial assistance kag ginhatagan lamang sang P1000 kada semester nga dapat P1500.
Bangud man sa kulang-kulang ang mga dokumento, ginpakamaayo ni BM Reyes nga mag-inisyatibo kag magpadulong sa mga accounting offices agud makakuha sang record angut sa mga natagaan ukon nabayaran na nga mga scholars.
Dugang pa sini nga katunga sa pondo para sa scholarship na lamang ang nabilin kag amu ang ireserba para masunod nga semester S.Y 2021-2022.
Luyag man ipalab-ot ni Reyes sa mga luyagmagpasakop sa scholarship magbisita lamang sa ila FB page nga Capiz Scholarship and Educational Assistance Program (CSEAP) ukon magpadala sang mensahe sa ila email nga (capizscholarshipsecretariat@gmail.com) agud mabantayan ang ila announcement, samtang paga-aksyunan naman ang mga natukiban nga iregularidad.
