ROXAS CITY – Dead on arrival nga ginpadangat sa Roxas Memorial Provincial Hospital (RMPH) ang 31-anyos nga seafarer, matapos bumunggo ang ginamaneho nga motorsiklo sa isa ka puno sang kahoy sa may bahin sang Barangay Buntod, banwa sang Panay.
Ginkilala ang biktima kay Joven Villanueva, soltero kag residente sang nasambit nga barangay.
Sandig sa inisyal nga imbestigasyon sang mga katapo sang Panay MPS, natabo ang aksidente alas-11:50 kagab-i, Disyembre 7, kun sa diin sandig sa pag-usisa sang kapulisan sa himata sang biktima, nga nag-inom-inom ini kaupod si certain “Patok” sang naglaong ini nga magapadulong sa Panay proper.
Apang, dirediretso ini nga nagmaneho sang iya Suzuki Smash nga motorsiklo sa kurbadahon nga porsyon sang karsada rason nga nadulaan ini sang kontrol sa manubela kag bumunggo sa amu nga kahoy.
Nag-angkon ini sang patal nga pilas sa iya ulo, bangud wala sang suksok nga helmet.
Gilayon nga ginparespondehan sa mga katapo sang Panay rescuers kag ginpadangat sa nasambit nga ospital apang gindeklarar nga DOA sang doktor, alas 12:56 sa kaaganhon, Disyembre 8.
